Inprimatu

 Ane Beitia eta Maialen Gurrutxaga emakumeen etxearen izango den lokala

Emakumeen Etxearen proiektuak aurrera darrai. Jada esleitu dira eraikina egokitzeko obren lanak: Elgoibarko Arkhiru Arkitekoak enpresari esleitu zaio Emakumeen Etxea izango den gunea egokitzeko obra. Hala, San Frantzisko kaleko 21 zenbakian, aurrez, Gotzon Garate Udal Liburutegia egon zen espazioaren erdia egokituko du, 150 m2 inguruko azalera izango duen Emakumeen Etxea sortzeko. Obra bi fasetan burutuko da eta 83.400,44 euroko aurrekontua du. Lanak urtarrilean hasiko dira, eta urtearen lehen seihilekoan bukatuta izatea aurreikusten da.

Emakume eta Gizonen arteko berdintasuna lortzeko bidean pausu berri bat da Emakumeen Etxea. Elgoibarko Udalak zerbitzu eta programen eskaintza zabala kudeatzen du berdintasunaren esparruan; behin Elgoibarko Emakumeen Etxea definituta, eraikina egokitu eta zabaltzea izango da pausu berria.

Horretarako, Udalak Emakumeen kontseiluarekin eta herriko beste hainbat talde eta arlotako emakumeekin elkarlanean, Emakumeen Etxea irudikatzeko ibilbidea diseinatu zuen 2020an parte-hartze prozesu bat medio.

Prozesuan zehaztu zen honako funtzioak beteko dituela Emakumeen Etxeak: Emakumeen parte-hartzea sustatzea bizitzako arlo guztietan, bereziki, jabekuntza indibidualetik kolektibora bideratutako jarduerak landuz; emakumeen bizi-baldintzak ez ezik, emakumeek jendartean duten tokia hobetzeko ere lan egitea; Elgoibarko talde eta elkarteen arteko elkarlana eta emakume anitzen arteko elkarlana sustatzea; berdintasunaren inguruko prestakuntza, sentsibilizazioa eta informazioa sustatzea; eta aldaketa soziala eta feminista lortzeko jarduera estrategikoak bultzatzea.

Ane Beitia alkateak nabarmendu duenez herritarren inplikazioa “handia” izan da: “parte-hartze prozesuan jasotako ekarpenak emankorrak izan dira. Emakume elkarte feminista ezberdinen iritziak jaso ditugu, eta norbanako moduan ere herritar askok parte-hartu dute. Xedea da espazio dinamikoa eta irekia izatea, enpatia sortzeko topagunea, ikasteko eta informazioa jasotzeko tokia, jabekuntza sareak sortzeko espazioa, eta emakumeen berdintasuna, askatasuna, partaidetza eta presentzia sustatzeko gunea”.

Beitiak berretsi duenez, “emakumeen etxea herriko emakume elkarteen eta mugimendu feministaren aspaldiko aldarrikapena da. Proiektu partekatua da zentzu orotan, berdintasunaren izpiritua guztion artean eraiki eta zabaldu behar baitugu eta Emakumeen Etxea tresna oso garrantzitsua izango da Elgoibar berdinzalea sustatu eta lortzeko”.

ADI! Gune honek cookie-ak eta antzeko teknologiak erabiltzen ditu. Zure nabigatzailearen konfigurazioa aldatzen ezbaduzu , bere erabilera onartzen ari zara.