6 enpresa aurkeztu dira King Kong zubia birmoldatzeko lehiaketara

  • Udalak martxan jarritako lehiaketa publikora aurkezteko epea ostiral honetan, maiatzak 12, amaitu da, 12:00etan.
  • Zubia birmoldatzeko lanak faseka egingo dira.Udan N-634 errepidearen gaineko pasabide berri bat, igogailua eta bertara sartzeko eskailerak eta N-634 errepidearen beste aldeko pasabidea egiteko lanak hasiko dira.Lehenengo fase honek 1.200.000 euro inguruko inbertsioa izango du, BEZa barne. Gauzatzeko epea 10 hilabetekoa izango da. Bigarren fasea denboran zehar modu jarraituan garatzea aurreikusten da.

6 enpresa aurkeztu dira Udalak abian jarritako lehiaketa publikora, King Kong zubia birmoldatzeko eta haren irisgarritasuna hobetzeko lehen faseko obrak egiteko. Udalak martxan jarritako lehiaketa publikora aurkezteko epea ostiral honetan, maiatzak 12, amaitu da, 12:00etan. Udalak enpresek aurkeztutako proposamenak aztertu eta lehiaketaren ebazpena  datozen asteetan burutuko du eta obra udan hasiko dela aurreikusten du.

Herritarren irisgarritasuna eta segurtasuna bermatzeko, eta, bereziki, Urazandi auzoko bizilagunena, eta eragin sakonak saihesteko, Udalak fasetan banatu du zubia birmoldatzeko obra, eta modu independentean egingo da.

Lehenengo faseak N-634 errepidearen gaineko pasabide berri bat, igogailua eta bertara sartzeko eskailerak eta Urazandi aldera doan N-634 errepidearen beste aldeko pasabidea hartzen ditu. Bigarren fasean, Deba ibaiaren gaineko pasabidea eta eskuinaldeko sarbide-arrapala birmoldatuko dira, eta Urazandiko pasabidea berrituko da, baita N-634 errepidearen gainean dagoen pasabidea eraitsi eta ibaiaren pasabidearekin lotuko ere. Hirugarren fasean, ibaiaren pasabidearen ezkerraldeko lotura-arrapala eta igogailuaren goiko ontziratzea jasotzen dira, eta, azkenik, laugarren fasean, Pilar ikastetxe zaharraren lurzatira sartzeko pasabidea sartzen da, Urazandi auzora sartzeko bidearen gainean.

Hartutako konponbidearen arabera, N-634 errepidearen gaineko bidegurutzean pasabide berri bat egongo da, gaur egun ibaia zeharkatzen duen pasabidetik gora, eta igogailu bat egongo da bi pasabideen arteko desnibela gainditzeko. Errepidearen gaineko pasabidearen azken muturrean beste pasabide bat dago, N-634 errepidearekiko nahiko paraleloa, Urazandiko bidearen espaloian amaitzen den trazadurarekin bat egiten duena. Tarte hori ez da aldatuko, % 2tik beherako luzetarako maldak dituenez, irisgarritasun-baldintzak betetzen baititu. Pasabide horrek Pilarreko ikastetxe zaharraren lurzatirako sarbidea emango du etorkizunean (4. fasea).

Lehenengo fase honek 1.200.000 euro inguruko inbertsioa izango du, BEZa barne. Gauzatzeko epea 10 hilabetekoa izango da. Bigarren fasea denboran zehar modu jarraituan garatzea aurreikusten da.