• Proiektua Emakume eta Gizonen Berdintasunerako III. Planaren barruan dago
  • Inkesta etxetik kanpo lan egiten duten pertsonei zuzenduta dago eta elgoibartarren denboraren erabilera, kontziliazioa eta erantzunkidetasuna ezagutzea du helburu.

Elgoibarko Udalak, herriko Emakume eta Gizonen Berdintasunerako III. Planaren testuinguruan, proiektu bat jarri du abian kontziliazioak Elgoibarren duen egoerari buruzko diagnosi sektoriala eta ekintza plana egiteko.

Horretarako, elgoibartarren denboraren erabilera, kontziliazioa eta erantzunkidetasuna aztertzeko galdetegi bat egin da. Inkesta hau etxetik kanpo lan egiten duten pertsonei zuzenduta dago eta ondorengo gaiei buruzko informazioa biltzea du helburu, besteak beste: lan ordutegien malgutasuna, bizitza pertsonala, familia eta lana uztartzeko zailtasuna, udalerriko zerbitzuak (kiroldegia, liburutegia, eta abar) herritarren errutinetara egokituta dauden, kontziliazio zerbitzu nahiko dagoen, etab.

Ane Beitiak, Elgoibarko alkateak, herritarren laguntza eskatu du “Elgoibartar guztiak informazio iturri oso garrantzitsuak dira proiektu honetarako, beraz, prozesu honetan parte har dezaten eskatzen diegu. 5 minutu bakarrik behar dira galdetegia betetzeko” adieraziz.

Galdetegia honako estekan dago eskuragarri:
https://docs.google.com/forms/d/e/1FAIpQLSfCSO-4ThQxLfja9NMgC_Y10ClpSOYlZZLL_Ho24eYb2633Mw/viewform?c=0&w=1

 

Ekintza iragartzeko kartela

  • Arratsaldeko 18:00etan ospatuko da Kultur Etxean eta herritar guztiak daude gonbidatuta beraien iritziak eta proposamenak helarazteko.
  • Hitzorduak, Elgoibar Mendebaldeko Muga Paisaien Ekintza Planaren (Moru-Olaso-Idotorbe) helburuak zehaztu eta ekintzak lehenarazteko balio izango du.
  • Parte hartzeko, E-mail hau spam roboten kontra babestuta dago. JavaScript aktibatuta izatea behar duzu hau ikusteko. helbidera email bat bidali beharko da.

Elgoibarko Udala, Moru, Olaso eta Idotorbe inguruko Paisaiaren Ekintza Plana ari da garatzen. Plan honek paisaiaren inguruan kalitatezko helburu batzuk eta udalerriko paisaia antolatu, kontserbatu eta berreskuratzeko balio izango duten ekintzak zehaztuko ditu.

Elgoibarko Udalaren ustez, herritarren parte-hartzea funtsezkoa da prozesu honetan, gai desberdinetan haien ikuspuntua, iritziak eta proposamenak eginez. Horretarako, Elgoibarko Udalak, helburuak zehazteko eta ekintzak lehenarazteko, herritarrei datorren ostegunean ospatuko den saiora hurbiltzeko deia luzatzen die:

- Eguna: Ekainaren 1ean
- Ordua: 18:00
- Lekua: Kultur Etxea (hitzaldi gela)

Saio honetara herritar guztiak daude gonbidatuta. Bertan, planaren metodologia azalduko da eta ekintza planaren zirriborroa landuko da. Parte-hartzea baieztatzeko, interesa dutenek E-mail hau spam roboten kontra babestuta dago. JavaScript aktibatuta izatea behar duzu hau ikusteko. helbide elektronikora mezu bat bidali beharko dute.

Aita Agirre proiektuaAita Agirre proiektua, barrutik ikusita

  • Aurkeztutako 16 enpresen artean, IZA Obras y Promociones SAren eskaintzak jaso du puntuazio onena, arlo teknikoan zein ekonomikoan.
  • Udalak, obrak 2,39 milioi euroan esleitu ditu. Lanak uztailean hastea aurreikusten da eta 14 hilabeteko iraupena izango dute.

Elgoibarko Udalak Aita Agirre eraikina eraberritzeko obrak IZA Obras y Promociones SA enpresari esleitu dio. Esleitze prezioa ia 2,4 milioi eurokoa da eta enpresak hamalau hilabeteko epea izango du obrak egiteko.

Aurkeztutako 16 enpresen artean, enpresa bizkaitarraren eskaintzak jaso du puntuazio onena, arlo teknikoan zein ekonomikoan. Guztira, 40 puntutik 34,4 lortu ditu.

Balorazio irizpidei dagokionez, beste batzuen artean, obren zein Elgoibarko ezagutza maila baloratu da, baita, obrek dirauten bitartean sor daitezkeen afekzioak eta proposatutako konponbideak ere. Balorazio-puntu guztiak kontuan izanda, IZA enpresak aurkeztutako proposamena orekatuena eta proiektua eta obren egikaritzea hobekien aztertu duena izan da.

Proposamen ekonomikoari dagokionez, hasieran proiektua gauzatzeko aurrekontua 3.519.489,69 €an (BEZa kanpo) ezarri zen arren, esleitutako enpresak, aldiz, 2.393.252,99 €ko (BEZa kanpo) eskaintza aurkeztu du, ekonomikoki errentagarriena izanik.

IZAk Euskadi osoan zehar eraikin anitzetan, modu oso egokian, egin izan ditu antzeko birgaitze lanak, besteak beste, Laudioko Musika Jauregiarena edota Bilboko Udaltzaingoaren bulego eraikinaren lehenengo fasea.

Lanak uztailean hasi eta 14 hilabeteko iraupena izatea aurreikusten da

Epeak baloratu ez arren, eta proiektua 18 hilabeteko iraupena izango zuela aurreikusten zen arren, enpresak, lanotarako 14 hilabeteko iraupena ezarri du. Esleipenak, Udalak finkatutako epeak jarraitzen ditu, inolako alterazio edo aldaketarik gabe.

Lanen hasiera, oraindik ere, erabakitzeke dagoen arren, partzialki, uztailean hastea aurreikusita dago. Afekzio gutxien suposatuko duten obrekin hasiko da, plaza irailera arte, erabat erabilgarri uzteko asmoz. Hortik aurrera, eraikina husteko lanekin hastea aurreikusten da. Momentu horretan, plazaren zati bat, zehazki, eraikinetik hurbilen dagoena, obren ondorioz, erabilgaitz geratuko da. Hala ere, plazaren zati handi bat aparkatzeko eta azoka antolatzeko erabilgarri utziko da.

www.aitaagirre.net ataria, proiektuaren jarraipen zehatza egiteko

Aita Agirre prozesu parte-hartzailearen baitan, Elgoibarko Udalak, urtarrilean proiektuaren jarraipen zehatza egiteko aukera eskaintzeko helburuarekin, www.aitaagirre.net izeneko ataria zabaldu zuen. Espazio berri honetan, Elgoibarko bizilagunek, prozesuan eman diren eta emango diren pausoen inguruko informazioa dute eskuragarri. Are gehiago, beraien iritzia emateko aukera ere badute “balorazioak” izeneko atalari esker.

Elgoibarreko Udalak, kulturgintza eta euskalgintza eremuetan jarduten duten eragileekin batera, herriko kultur azpiegiturez eta horien erabileraz hausnartu zuen 2014an. 2016an, berriz, eta gogoeta horiek abiapuntu hartuta, Aita Agirre eraikina eraberritzeko proposamenak hirigintza eremuko idazketa urbanistikoaren proiektuan txertatzeko lanetan aritu da Udala. Hala, esan bezala, prozesu hauen emaitzak eta sortuko diren eduki eta dokumentazioaren hedapena errazteko helburuarekin, aitaagirre.net ataria sortu da. Bertan eraikinaren historia, planoak, infografiak eta fotomuntaiak daude eskuragai besteak beste.

Dolmenen Ibilbidea

 

  • Zortzi bisita izango dira guztira, doakoak, ekainaren 11tan hasi eta urriaren 8ra bitarte.

  • 2017ko lan-ildoen baitan, Gizaburuako trikuharriaren indusketa eta erreprodukzio lanei ekingo zaie datozen egunotan. Aranzadi Zientzia Elkarteak burutuko ditu lanak, trikuharri horren aberastasun arkeologikoa balioan jartzeko eta Dolmenen Ibilbidearen erakarpen turistikoari bultzada emateko.
  • Aurten egingo diren lanen programa Bergarako, Elgoibarko eta Soraluzeko Udalek taxutu eta abiatu dute, Debegesa garapen agentziaren koordinaziopean, eta Gipuzkoako Foru Aldundiko Turismo eta Kultur sailaren laguntzarekin. 

Dolmenen Ibilbidearen balio arkeologikoa eta geologikoa zein paisaia-balioa ezagutzera emateko doako 8 bisita gidatu antolatu dira. Datorren ekainaren 11an, igandean, ekingo zaie bisitei eta urriaren 7an amaituko dira. 9 kilometroko ibilbide gidatua izango da, Karakaten hasi eta Irukurutzetaraino, eta buelta berriz Karakatera.

Bisita gidatuen eta 2017an aurreikusitako lanen aurkezpenean egon dira Soraluzeko alkatea, Iker Aldazabal; Bergarako alkateordea, Maite Agirre; Elgoibarko kultur zinegotzia, Andrea Arriola; Aranzadi Zientzia Elkarteko arkeologoa, Jesus Tapia; eta Debegesako zuzendari orokorra, Juan Angel Balbas.

Dolmenen Ibilbideak Karakate-Agirreburu banalerroa zeharkatzen du, eta Elgoibarko, Soraluzeko eta Bergarako udalerriak lotzen ditu.

Ibilbideak balio arkeologiko handia du, bertan aurkitzen den historiaurreko ondareagatik: Neolitoko eta Brontze Aroko tumuluak eta trikuharriak, hain zuzen. Giza taldeek horrelako mendilerroak, paisaiaren mugarri nagusi zirenak, aukeratu zituzten hildakoak ehorzteko eta beren lurraldea seinalatzeko. Monumentu megalitikoen bidez utzi diguten ondarea antzinako ehorzte-errituekin lotuta dago.

Bisita gidatuak igandez egingo dira, 10:30etik 13:30era. Behin ibilbidea amaituta, gazta, ogia eta sagardoa izango dira dastagarri. Bisita gidatuetan parte hartzeko aldez aurretik izena eman behar da E-mail hau spam roboten kontra babestuta dago. JavaScript aktibatuta izatea behar duzu hau ikusteko. helbidera idatziz edo 943 82 01 10 telefonora deituz (Ainara Lasa, Debegesa).

*Bisita gidatuen datak: ekainak 11, uztailak 2, uztailak 16, uztailak 30, abuztuak 6, abuztuak 20, irailak 10, irailak 24 eta urriak 7.

Boluntarioak behar dira Gizaburuako trikuharrian egingo diren indusketa lanetan laguntzeko

Dolmenen Ibilbidearen 2017ko lan-plangintzan jaso bezala, Aranzadi Zientzia Elkartea datozen egunotan hasiko da Gizaburuako trikuharriaren indusketa eta berrinterpretatze lanetan (data zehatza laster emango da ezagutzera).

Ikerketaren helburua da Gizaburuako trikuharriaren egitura arkitektonikoa eta bere baitan duen edukia ezagutzea, ondoren, hori guztia balioan jartzeko. 2016an egindako indusketek informazio baliagarria lortzea ahalbidetu zuten. Aranzadi Zientzia Elkarteak dioenez, ordura arte ez zekiten Gizaburuako elementua trikuharri bat zenik. Tumulu soil bat bezala zegoen katalogatuta: jakina zen hilobi bat estaltzeko erabili ohi zen harri-multzoa zela, baina ez zen ezagutzen zein hilobi-mota gordetzen zuen azpian. Iaz, hilobiaren ganbara aurkitu zuten Aranzadiko kideek. Hala, trikuharria zela baieztatu ez ezik, azken aldiz erabilia izan zeneko arrastoak ere aurkitu zituzten. 

Adituen esanetan, Gizaburuako trikuharriaren azken erabilera hori kremazio-erritu batekin lotuta dago, erraustutako giza hezurrak eta zeramikazko ontzi baten zatiak aurkitu baitziren bertan.

Gizaburuako trikuharriaren azken erabilpen hori Azken Brontze Aroan edo Burdin Aroan (K.a. 1.200-700 urte) kokatzen dute adituek, trikuharri horretan garai hori baino lehenagoko piezak aurkitu badituzte ere. Egingo diren hurrengo ikerkuntza lanen helburua da, trikuharriaren azpia arakatuz, antzinako beste erabilpenik eman zitzaion ezagutzea, seguruenik, zientzialarien ustez, Neolito (4.500-2.500 urte k.a) eta Antzinako Brontze Aroen bueltan (2.000 urte k.a).

Ikerketa eta indusketa lanak burutzeko boluntarioak behar dira. Interesatuek izena eman dezakete E-mail hau spam roboten kontra babestuta dago. JavaScript aktibatuta izatea behar duzu hau ikusteko. helbidera idatziz edo 676 49 01 43 (Jesus Tapia) telefonora deituz. 

Lursailen erosketa

Dolmenen Ibilbideak Elgoibarko, Soraluzeko eta Bergarako udalerriak lotzen ditu. Hiru Udalak erosketa publikoan oinarritutako kudeaketa sistema bat ezartzearen aldeko apustua ari dira egiten. Adibide modura, Soraluzeko Udalak 33.000 metro koadroko lur-saila erosi zuen. Eta 2017an, 17.000 metro koadroko eremuaren erosketa aurreikusten du Udalak. Halako neurriek Dolmenen Ibilbidearen kudeaketa, mantentze eta zainketa hobea ahalbidetzen dute. Halaber, azpimarratzekoa da egingo diren indusketak lursail publikoetan egingo direla, eta pribatuetan egingo direnek eremu horietako jabeen baimena dute.

Ibilbideko hainbat elementuren errepresentazio birtuala

2017ko lan programa Soraluzeko, Elgoibarko eta Bergarako Udalek elkarlanean taxutu eta garatu dute, Debegesa Debabarreneko garapen agentziaren koordinaziopean, eta Gipuzkoako Foru Aldundiak lagunduta. Halaber, Debemen Debabarreneko Landa Garapenerako Elkarteak eta Aranzadi Zientzia Elkarteak ere parte hartu dute.

Urte honen amaiaren, Dolmenen Ibilbidearen hiru elementuren interpretazio birtualari ekingo zaio: Keixetako Egiya Hegokoa trikuharria, Arribiribilletako menhirra 

eta Gizaburuako trikuharria zein bertan egingo diren indusketa lanetan aurkituko diren elementuak.

Lan horren funtsa da arkeologoek egindako aurkikuntzen gainean interpretazio birtual bat egitea, elementu megalitiko horien sorrera irudikatzeko xedez.

Paleoingurumen ikerketetan oinarrituz egingo da errepresentazio birtuala, bai elementu megalitikoak bai ingurunea barne hartuz.

Ibilbide tematikoaren laugarren urtemuga

2013an aurkeztu zen ofizialki Dolmenen Ibilbidea. Proiektu hau aurrera eramateko arrazoien artean daude ibilbideak eta, orokorrean, inguruneak daukan potentzial turistikoa. Lau urte hauetan berretsi egin da ibilbideak duen interes turistikoa, bisitari asko gerturatzen baitira ibilbidea egitera.

Dolmenen Ibilbideak, PR-Gi 94 izendapenarekin, 20 kilometro dauzka eta Karakate-Agirreburu banalerroa zeharkatzen du, Elgoibarko, Soraluzeko eta Bergarako udalerriak lotuz.

Ibilbideak edertasun eta balio handiko kultur eta historia ondarea dauka. Dolmenen Ibilbidean, Aita Barandiaranek hala izendatu zuen, antzina Deba eta Urola bailaren arteko igarobidea izan zen lurretan sartzen gara. Bertan gure arbasoen aztarnak ikus daitezke, Elosua-Plazentzia estazio megalitikoa osatzen duten tumulu eta dolmen multzoa, hain zuzen. Dolmen hauek Karakate, Irukurutzeta eta Agirreburuko tontorrek marrazten duten mendilerroan sakabanatuta daude. Ikuspegi ederrek gainera, are interesgarriagoa egiten dute ibilbidea.

celtas

Datorren ekainaren 16an, ostirala, musika hitzordu garrantzitsua izango da Elgoibarren. Celtas Cortos musika talde entzutetsuak eta Elgoibarko Udal Musika Bandak kontzertu berezia eskainiko dute Kalegoen plazan, gaueko 22:30etatik aurrera. 

OinAlai 2017 Página 1

Elgoibarko Udalak, Ikastolak eta Herri Eskolak ikasleak eskolara oinez joatera animatzeko asmotan, orain dela zazpi urte, bultzatu zuten Oin alai egitasmoaren parteharzaileek urteurren ekitaldia ospatuko dute ostiral honetan, maiatzak 26.

Ostiral honetako ekitaldian umeak Atxutxiamaika txarangako kideak lagunduta joango dira ikastetxeetara. Musika eta animazioa izango da nagusi.

Era berean, programaren antolatzaileek jakinarazi dute datorren ikasturtean Oin Alai egitasmoan parte hartzeko izena emateko aukera dagoela Udaletxean eta ikastetxeetan. Izan ere, egun horretan bertan, izena emateko triptikoa banatuko da ikastetxeetan.

Aipatzekoa da ere,proiektuan zertan datzan ezagutarazteko helburuarekin, ekainaren 7an Oin Alai-ren ate irekiak izango direla.

2017-2018 ikasurteko informazioa (PDF)

Bertsogintza

Elgoibarko Udalak finantzatutako eta Gipuzkoako Bertsozale Elkarteak zuzendutako “Ahozkotasuna eta bertsogintza” proiektuan jardun duten ikasleek, asteazken honetan, maiatzak 24, bertso-jaialdi bat egingo dute urtean zehar egin duten lanaren erakusgarri. Jaialdiak Elgoibarko Herriko Antzokian izango dira, 17:30ean eta 19.00etan eta sarrera doakoa izango da bi kasuetan.

“Ahozkotasuna eta bertsogintza” programa ikasturte honen hasieran jarri zen martxan Elgoibarren ahozko komunikazioa bertsoaren bidez lantzeko helburuarekin. Guztira, 251 ikasle aritu dira ahozkotasuna eta bertsogintza lantzen ikasturte honetan: Herri Eskolako 4. eta 5. mailako ikasleek eta Ikastolako 5. eta 6. mailakoek jardun dute egitasmo horren baitan.

Aurtengoa proiektu honen hamabigarren edizioa izan da, eta bertan parte hartu duten ikasleek, astean, ordubete eskaini diote ahozkotasuna lantzeari, horretarako bitarteko tresna bertsoa izan dutelarik. Saioen gidariak Iñaki Gurrutxaga eta Jokin Labayen bertsolariak izan dira.

Elgoibarko Udalaren Euskara Sailak gonbite berezia egin nahi die proiektu honetan parte hartu duten ikasleen gurasoei, euren seme-alabek ikasturtean landutakoaren emaitza ikustera joan daitezen.

 

Ke detektorearen prentsaurrekoa

  • 80 urtetik gorako 271 pertsonei eskainiko zaien suteen kontrako prebentzio zerbitzu bat da, onuradunen zein ondoko auzuneen segurtasuna bermatzea helburu duena.
  • Sabaian, obrarik gabe, instalatzen den gailu txiki bat da, etxebizitzan sute edota ke pilaketa kasuan, alarma gisa jokatzen duena. Alarmak, bolumen oso altuko soinu bat emititzen du, beraz, etxebizitzan bertan bizi diren pertsonak, zein ondoko auzokideak ere jakinaren gainean jarriko ditu.
  • Aukeratutako etxebizitzek, bihartik aurrera, Udaleko gutun bat jasoko dute, non gailuaren doako instalakuntza eskainiko zaien. Udalak sortuko diren kostuak bere gain hartuko ditu, beraz, onuradunentzako inongo kostu gehigarririk ekarri gabe.

Elgoibarko Udalak, gutxi barru, 80 urtetik gorako adinekoen etxebizitzetan ke detekzio zerbitzu bat jarriko du martxan. Neurri honen bidez, Kontsistorioak, etxean gertatzen diren istripuei dagokionez, kolektibo kaltebera kontsideratzen den talde garrantzitsu hau babestea eta euren ongizatea eta segurtasuna hobetzea bilatzen du.

Hartzaile zein ondoko auzuneen babesa bermatzeko helburuarekin, zerbitzua, guztira, 271 pertsonei eskainiko zaie. Halaber, Elgoibarko alkateak, Ane Beitiak, adierazi duenez: “Pertsona hauek bakarrik bizi ahal izateko autonomia maila handia izan arren, erreakzionatzen gehiago tardatzean arazo txikiek sute bat jasateko arriskua handitu dezakete. Horregatik, Udalak, bakarrik bizi diren pertsonen bizi-kalitatea hobetzeko prebentziozko neurrien ezarpenaren alde egitea komeni dela uste izan du."

Izan ere, segurtasuna indartzeko eta kolektibo honek bere ingurunean ahalik eta denbora gehien modu seguruago baten bizitzen jarraitu ahal izateko asmoz, zerbitzu hau doan izango da, Udalak sortuko diren kostuak bere gain hartuko dituelarik, eta zerbitzua zuzentzen den pertsona onuradunentzako inongo kostu gehigarririk ekarri gabe.

Sabaian, obrarik gabe, instalatzen den gailu txiki bat da, etxebizitzan sute edota ke pilaketa kasuan, alarma gisa jokatzen duena. Alarmak, bolumen oso altuko soinu bat emititzen du, beraz, etxebizitzan bertan bizi diren pertsonak, zein ondoko auzokideak ere jakinaren gainean jarriko ditu.

Instalakuntza prozedura

Aukeratutako etxebizitzek, bihartik aurrera, Udaleko gutun bat jasoko dute, non gailuaren doako instalakuntza eskainiko zaien. Hortik aurrera, behar bezala identifikatutako teknikari bat, etxebizitzetan bertaratuko da eta emergentzia kasuan ebakuazioa errazteko etxeko krokis bat egingo du. Halaber, etxeen ezaugarriak kontuan izanda, gailuaren kokapena ere erabakiko du. Teknikoa, erabiltzailearen ohituren datuak bilduko dituen zerbitzu sozialetako langile batez lagundurik, bertaratuko da. Era honetan, zerbitzu sozialek bakarrik bizi diren adinekoen irudi bat izango dute eta antzemandako gabeziei aurre egiteko ekintzak ezarri ahal izango dituzte.

Omenaldia

  • Ane Beitia, Elgoibarko alkateak, udalbatza lagun, Udaleko arkupeetan C.D. Elgoibar taldeari harrera egin zion atzo. Ongietorriaren ondoren, Udaleko Osoko Bilkuren Aretora joan ziren, non aintzatespen gisa oroigarri bat eman zitzaien.

Elgoibarko Udalak, atzo, ostirala maiatzaren 19an, bere lehenengo urteurrena dela eta omendu nahi izan zuen C.D. Elgoibar taldeko zenbait ordezkariri harrera egin zien.

Klubaren jarduera zabala ezagutarazi eta nabarmentzeko asmoz, arratsaldean zehar hainbat ekitaldi antolatu ziren. Ekitaldiak, arratsaldeko 18:00etan hasi ziren Futbol Eskolako jokalarien partiduekin Aita Agirre plazan, Lekuederren eta Kalegoen plazan. 19:30ean ekitaldi nagusia izan zen. Ane Beitia, Elgoibarko alkateak, udalbatza lagun, Udaleko arkupeetan C.D. Elgoibarko zenbait ordezkariri harrera egin zien. Harrera ohorezko Agurrarekin hasi zen Haritz Euskal Dantzari Taldea eta Udal Txistu Bandaren eskutik. Eta ongietorriaren ondoren omendu guztiak Udaleko Osoko Bilkuren Aretora joan ziren, non aintzatespen gisa oroigarri bat eman zitzaien.

Ane Beitia alkateak kluba bere jardueragatik zoriondu nahi izan zuen eta bere esanetan “Egun, gutxi dira bere lehenengo urteurrena betetzeaz harro ibili daitezkeen lurraldeko kirol klubak, eta urte honetatik aurrera C.D. Elgoibar taldeko beraietako bat da, hortaz, urte guzti hauetan egin duzuen lanagatik zoriontzea besterik ez zait geratzen. Berriz ere, eskerrik asko udalerriko bizitzan berebiziko egitekoa betetzeagatik”.

Ekitaldian zehar, omenduak orokorrean kirolari eta zehazki futbolarekin lotutako zenbait pertsonekin egon ziren. Besteen artean nabarmenenak: Jesús Gutiérrez, Gipuzkoako Foru Aldundiko Kirol Zerbitzuko Teknikaria; Juan Luis Larrea, Gipuzkoako Futbol Federazioko Presidentea eta Elgoibarko zenbait kirol-klubetako presidenteak.

Eguna bukatzeko, Kalegoen plazan Aterri talde elgoibartarraren kontzertua izan zen.

C.D Elgoibar, 100 urteko historia

100 urte pasa dira Demetrio Vallejo eta Ricardo Astigarra buru izanik elgoibartarrez osaturiko talde batek Elgoibar Football Club, egun C.D. Elgoibar dena, sortu zuela. Talde hark bere lehenengo partiduak Azkueko lursailean jokatu zituen, Mintxetako kirol gunetik metro gutxira, egun talde elgoibartarrak jokatzen duen tokia eta orain hamarkada bat Lerun zelai historikoari jarraitu ziona.

Aipatzekoa, gainera, azkenengo mendean zehar, guztira C.D. Elgoibar taldetik pasatu ziren hamahiru futbolarik (hamaika gizonezkoen ligan eta bi emakumezkoenean) estatuko Lehen Mailan jokatzen bukatu zutela. Hala nola, Tiburcio Beristain, Ricardo Suarez, Antonio Ansola, Josetxo Araquistain, Fernando Ansola, Juan Cruz Sol, Jose Mari Arakistain, Jose Luis Gonzalez, Joseba Etxeberria, Zuhaitz Gurrutxaga, Itziar Gurrutxaga eta Eli Ibarra.

Pleno txikia

  • Elgoibarko alkateak eta Elgoibarko Udaleko zinegotziek Ikastola eta Herri Eskolaren ordezkari gisa Agenda 21 egitasmoan parte hartu duten 45 herriko ikasle hartu dituzte.
  • Ekitaldia maiatzaren 18an, osteguna, izan da 11:00etan Elgoibarko Udaleko Osoko Bilkuren Aretoan.
  • Aurtengo ikasturtean ikasleek bioaniztasuna gaia landu dute.
  • Ikasleen aurkezpena (PDF)

Ostegun honetan, maiatzaren 18an Elgoibarko alkateak, Iosu Arraiz, Blanca Larrañaga, Andrea Arriola, Miren Arrate eta Nerea Alustiza zinegotziek eta Iñaki Galdos udal idazkariak Agenda 21 egitasmoan parte hartu duten herriko ikasleak hartu dituzte Osoko Bilkuren Aretoan.

Osoko Bilkuran guztira, Ikastola eta Herri Eskolaren ordezkari gisa, 45 adingabek parte hartu dute. Ikastolako ikasleek 6 proposamen egin dituzte eta Eskolakoek ere, beste 6. Hala ere, aipatu behar da Meka, Arreiturre  institutua eta IMH ikastetxeek ere parte hartu dutela proiektuan. Debabarrenako Eskola Agenda 21 Ingurugela eta Debegesa Garapen Agentziaren koordinaziopean egiten da. Egitasmoa Eusko Jaurlaritzak diruz laguntzen du. Aurtengo ikasturtean ikasleek bioaniztasuna landu dute.

Gai hau lantzeko, urtean zehar hainbat ekintza burutu dute ikastetxeetan eta herriko diagnostikoa burutu dute, hobetu beharreko puntuak identifikatuz. Osoko Bilkura Berezi hau bere proposamenak ezagutu arazteko eszenatoki izan da.

Udal ordezkariek ikasleen eskaera eta proposamenak adi entzun dituzte eta bananbanan erantzun dituzte. Amaitzeko, eskerrak eman dizkiete denei egindako lanarengatik eta datorren urte arte agurtu dituzte. Bukatzeko, luntx osasuntsua eta iraunkorra dastatzeko aukera izan dute ikasle eta irakasleek.

Pleno txikia 1

txikieguna

Kultura eta Euskarako Batzordeak, atzo, maiatzaren 16an, izandako bileran, eta talde guztien adostasunez, Txiki Eguna ospatzeko data abuztuaren 25ean, ostirala, finkatu dute eta Gazte Eguna, 28an. Hala ere, kontzertuaren data oraindik finkatu gabe dago.

Hasiera batean Txiki Eguna abuztuaren 28rako, astelehena eta lan eguna, ezarri zen arrazoi desberdinengatik. Esanguratsuena Gazte Eguna eta bere kontzertu jendetsuarekiko aldiberekotasuna zen, zeinek txiki Eguna Elgoibartarren artean hain sustrai sakonak dituen festa hutsalduko zuen. Baina azkenik, eta zenbait herritar eta udal talderen eskaeren ondoren, Udalak ohiko eguna mantentzea erabaki du eta Txiki Eguna abuztuaren 25ean ospatzea.